समाचार

पर्यटकीयस्थल भालुढुङ्गाको संरक्षणमा जुट्दै युवा

२०७४ कार्तिक १२ आइतबार गते ०८:४५ मा प्रकाशित

सन्दकपुर संवाददाता

इलाम १२ कात्तिक

 सदरमुकाम नजिकै रहेको पर्यटकीयस्थल भालुढुंगाको संरक्षण अभावमा ओझेलमा परेपछि स्थानीय युवा जुट्न थालेका छन् । 
ऐतिहासिक चियाबारी, दृश्यावलोकन स्तम्भभन्दा पृथक् गन्तव्य बोकेको भालुढुङ्गा संरक्षणका लागि स्थानीय गढीथुम्काका युवक हरि गुरुङको अगुवाइमा युवाहरू भालुढुङ्गालाई पर्यटकीयस्थलका रूपमा विकास गर्न लागिपरेका हुन् ।
सदरमुकामबाट चियाबारी हुँदै एक किमी दूरीमा अवस्थित भालुढुङ्गा इलाम नगरपालिका–६ गढीगाउँमा छ । यस क्षेत्रबाट विभिन्न पर्यटकीयस्थल माईपोखरी, जसवीरे र पुवाखोला दृश्यावलोकन गर्न सकिन्छ । यस क्षेत्रको संरक्षण र प्रचार जरुरी छ भन्दै स्थानीयवासी युवा सक्रिय सहभागी संरक्षणमा जुटेका हुन् । भालुढुङ्गा क्षेत्र विकास समितिका स्वयम्सेवक कपिल कोइरालाले करिब १४ हेक्टर क्षेत्रफलमा फैलिएको पुरानो वन क्षेत्रको संरक्षणमा समेत जोड दिइने बताए । 
यस क्षेत्रमा चिडियाखानासमेत स्थापना गरी पर्यटन प्रवद्र्धन गर्न स्थानीयस्तरमा पाइने जीवजन्तुको संरक्षण गर्ने युवाको लक्ष्य छ । आफूहरूले भर्खरै काम शुरू गरेको हुनाले स्रोत तथा साधन अभाव भएको संरक्षणकर्मी हरि गुरुङ बताउँछन् । योजना र कामको शुरूआतसँगै पर्यटकीयस्थलको विकासका लागि सरोकार भएका निकायको महत्वपूर्ण सहयोग हुने अपेक्षा रहेको उनले बताए ।
स्थानीय क्षेत्रको पर्यटनलाई ध्यानमा राखी विश्रामस्थलका रूपमा विस्तार गरिनाका साथै वनभोजस्थलका रूपमा विकसित गरिने बताइएको छ । भालुढुङ्गा आन्तरिक तथा बाह्य पर्यटकलाई थप मनोरञ्जनका लागि उपयुक्त गन्तव्यसमेत रहेको छ । दैनिकजसो १० भन्दा बढी युवा यसको संरक्षणमा जुटेका छन् । 
मेची पहाडी पर्यटन विकास समितिका कार्यकारी निर्देशक केशवकुमार धौरालीले सदरमुकामको नजिक अवस्थित भालुढुङ्गाबाट विभिन्नस्थलको दृश्यावलोकन गर्न सकिने भएकाले मेची पहाडी पर्यटनमा सहयोग पुग्ने बताए । 
भालुढुङ्गा संरक्षण शुरू हुनेबित्तिकै तेस्रो मुलुकबाट इलाम आउने पर्यटक सो क्षेत्रमा पुग्न थालेका छन् । नेपाल आफ्नो दोस्रो घर बताउने इटालेली पर्यटक टोलीका नेता पाउलो पाइचेलेकोले आफ्नो टोलीका साथ भालुढुङ्गा अवलोकनका क्रममा बाँसघारी, सिंहदेवीको मन्दिर, अलैँचीबारी, सिरुबारी, परम्परागत शैलीको नाली धारा, झ्याउँकिरीको आवाजले आफूहरूलाई आकर्षित गरेको बताए । 
यस क्षेत्रको विकासमा सरोकार भएकाहरूले सहयोग गर्न सके विदेशी पर्यटक भित्र्याउन सजिलो हुने सञ्चारकर्मी सन्तोष नेम्वाङको भनाइ छ । जिल्लाका विभिन्न स्थानमा पाँच दर्जनभन्दा बढी पर्यटकीयस्थल रहे पनि उचित प्रचारप्रसार र संरक्षणको अभावमा ओझेलमा परेका
छन् ।


यसमा तपाईको मत



सम्बन्धित सामाग्री

फेसबुक

जनमत

Loading...